२०८३ कार्तिक १५ गते आइतवार
२०८३ कार्तिक १५ गते आइतवार
.gif)
काठमाडौं । एनएमबि बैंक लिमिटेडले चालु आर्थिक वर्ष २०८३/८४ को पहिलो त्रैमासमा १ अर्ब १६ करोड रुपैयाँ खुद नाफा आर्जन गरेको छ। बैंकको यो नाफा गत आर्थिक वर्षको सोही अवधिको ९१ करोड ६० लाख रुपैयाँको तुलनामा २७.११ प्रतिशतले बढी हो।
बैंकको नाफामा भएको वृद्धिसँगै प्रतिसेयर आम्दानी (ईपीएस) र सेयरधनीलाई वितरण गर्न सकिने नाफामा समेत सुधार आएको छ। बैंकको वार्षिकीकरण गरिएको प्रतिसेयर आम्दानी २५.४२ प्रतिशतले बढेर २३ रुपैयाँ ८३ पैसा पुगेको छ। त्यस्तै, वार्षिकीकरण गरिएको प्रतिसेयर वितरणयोग्य नाफा ४३.८८ प्रतिशतले बढेर ११ रुपैयाँ ६४ पैसा पुगेको छ।
चालु आर्थिक वर्षको पहिलो तीन महिनामा बैंकको कर्जा तथा निक्षेप दुवैमा वृद्धि भएको छ। बैंकको कुल कर्जा ८ अर्ब ९ करोड रुपैयाँले बढेर २ खर्ब ७६ अर्ब ४ करोड रुपैयाँ पुगेको छ।
त्यसैगरी, बैंकको कुल निक्षेप ६ अर्ब ३ करोड रुपैयाँले वृद्धि भई ३ खर्ब २४ अर्ब रुपैयाँ पुगेको छ। बैंकको कर्जा वृद्धिदर समग्र बैंकिङ क्षेत्रको औसत वृद्धिदरभन्दा माथि रहेको विवरणमा उल्लेख छ।
बैंकको सञ्चालन नाफा २६.१७ प्रतिशतले बढेर १ अर्ब ८९ करोड रुपैयाँ पुगेको छ। नाफामा भएको वृद्धिसँगै बैंकको समग्र वित्तीय कार्यसम्पादनमा सुधार देखिएको छ।
यस अवधिमा सम्भावित कर्जा नोक्सानी व्यवस्थापनका लागि छुट्याउनुपर्ने खर्चसमेत घटेको छ। बैंकको इम्पेयरमेन्ट चार्ज २९.६६ प्रतिशतले घटेर ५० करोड २१ लाख ८० हजार रुपैयाँमा झरेको छ।
बैंकको खराब कर्जा अनुपातमा पनि सामान्य सुधार आएको छ। अघिल्लो त्रैमासमा ४.९७ प्रतिशत रहेको खराब कर्जा अनुपात घटेर ४.९२ प्रतिशतमा झरेको छ। यसले बैंकको कर्जा गुणस्तरमा केही सुधार भएको संकेत गर्छ।
पहिलो त्रैमासको वित्तीय विवरणले एनएमबि बैंकको खुद नाफा, सञ्चालन नाफा तथा प्रतिसेयर आम्दानीमा वृद्धि भएको देखाएको छ। कर्जा तथा निक्षेप विस्तारसँगै खराब कर्जा अनुपातमा आएको कमीले बैंकको वित्तीय अवस्थाबारे सकारात्मक संकेत गरेको छ।
© 2026 All right reserved to khabarcnter.com | Site By : Sobij
